Moción sobre comedores escolares e aula matinal

O mes de febreiro presentamos unha moción no Concello de Cangas sobre os comedores e as aulas matinais dos centros públicos do noso Concello. 

Aquí deixamos a moción completa que foi aprobada no Pleno de febreiro.

Moción sobre a xestión dos comedores e aula matinal nos centros de ensino do Concello de Cangas. A Federación de Centros Públicos de Cangas “A Gameliña” na que forman parte á ANPA Cruz de Castro (EI Galiña Azul do Hio), ANPA Choupana (EI Galiña Azul da Choupana), ANPA A Rúa (CEIP A Rúa), ANPA Fornobedo (CEIP Castrillón-Coiro), ANPA Espiñeira (CEIP Espiñeira-Aldán), ANPA do Hio (CEIP do Hio), ANPA Terazán (CEIP Nazaret), ANPA San Roque (CEIP San Roque), ANPA IES Rodeira (IES Rodeira), ANPA María Soliño (IES María Soliño) e ANPA Piñeiral do Rei (IES Monte Carrasco) presenta esta moción sobre os comedores escolares e o aula matinal do noso Concello para o seu debate no Pleno do Concello de Cangas. 

Exposición de motivos: 

Dentro das obrigas da Consellaría de Educación figura a xestión das actividades complementarias como son os comedores e as aulas matinais e tamén dende os Concellos debe existir un compromiso para que estes servizos se leven a cabo sen distincións segundo o centro escolar onde a rapazada este matriculada. 

 No noso Concello temos diferentes modelos de xestión no servizo de comedores nos centros de Primaria. Temos dous comedores xestionados directamente pola Xunta con cociña propia (CEIP Castrillón e CEIP San Roque) e 4 xestionados polo Concello a través dun convenio asinado coa Xunta de Galicia (CEIP A Rúa, CEIP Espiñeira, CEIP do Hio e CEIP Nazaret). 

Estes dous modelos de xestión fan unha clara diferenciación entre as familias de Cangas tanto a nivel alimentario como económico. 

Sumado a este servizo que non é máis que unha medida de axuda a conciliación ás familias para que mulleres e homes podan acceder en igualdade de oportunidades a vida laboral temos que engadir o servizo de aula matinal que é un servizo de atención as crianzas dentro de cada centro escolar de primaria nas horas que van antes do inicio das clases que na actualidade as ANPAs están asumindo a súa xestión a pesar de que non é unha competencia que figure entre as súas funcións. 

Por todos estes motivos propoñemos o seguinte ACORDO para que o Pleno do Concello de Cangas inste ó Goberno Municipal para que: 

1. O Pleno do Concello de Cangas insta a Consellaría de Educación a asumir o servizo de comedor e aula matinal en todos os centros escolares públicos do Concello de Cangas garantindo que toda a rapazada deste Concello acceda en igualdade de condicións. 

2. O Pleno do Concello de Cangas insta ó Goberno Municipal namentres non asuma a Xunta de Galicia a súa xestión directa que comece coa nova licitación do comedor e continúe prestando o servizo así como que aumente os recursos destinados ós comedores escolares e mellore a calidade do servizo garantindo unha alimentación saudable, equilibrada, de proximidade e adaptada as crianzas. 

 3. O Pleno do Concello de Cangas insta ó Goberno Municipal, que namentres a Consellaría de Educación non asuma a responsabilidade da xestión das Aulas Matinais asuma a súa xestión ou organización dende o Concello para que as ANPAs deixen de prestar este servizo. 

Titorial para familias sobre o uso e os riscos das novas tecnoloxías.

 

Igualdade e Discapacidade.

En Anpas Galegas, cando falamos de igualdade, falamos de todas e de todos e de todas as nosas circunstancias.

O venres 22 de novembro as compañeiras de Federación de centros públicos de Cangas "A Gameliña"  temos a derradeira presentación da nosa guía na Casa da Xuventude de Cangas.

Anótate en https://forms.gle/bi9zXhJJocohYKv76 tamén contamos con servizo de canguraxe previa inscrición.

A Confederación ANPAS GALEGAS realiza esta actividade o aveiro das "Axudas dirixidas  ás asociacións de nais e pais do alumnado de centros educativos de Galicia coa finalidade de potenciar a promoción da igualdade e a prevención da violencia de xénero".

Scape Room. Escapa da desigualdade.

Continúamos cos obradoiros para as crianzas dos IES María Soliño, IES Rodeira e IES Monte Carrasco nesta ocasión participarán nun Scape Room co título Escapa da desigualdade onde coñecerán a historia dunha muller, Carmen, a cal fai máis dun século conseguiu crearse a si mesma e converterse nunha muller de éxito a pesar das dificultades e trabas ás que se tivo que enfrontar.

A Federación de ANPAs de centros públicos A Gameliña realiza estas actividades o aveiro da "Axudas dirixidas ás asociacións de nais e pais do alumnado de centros educativos de Galicia coa finalidade de potenciar a promoción da igualdade e a prevención da violencia de xénero".

 

Actividade para familias.

Ola familias, dende a Federación de ANPAS de Cangas "A Gameliña" convidámosvos este venres 15 de novembro e o venres 29 de novembro, ás 18h, na Sala de exposicións do Auditorio de Cangas a un espectáculo familiar.

Novos Lobos de Fantoches Baj.

Novos lobos é un espectáculo de narración oral e monicreques que aborda o xénero desde a perspectiva das novas masculinidades. Deconstrúense nel algúns contos da literatura popular para adaptalos a unha nova ollada, nunha tentativa de ofrecer ferramentas conceptuais ao alumnado que axuden a prever a violencia de xénero. O espazo no que sucede a acción é un pequeno refuxio da montaña no que un pastor está coidando das súas ovellas (o público).

Estrafalaria de Xarope Tulu.

Este espectáculo combina a narración oral coa manipulación de obxectos e onde o público participa activamente do relato. Os personaxes que interveñen na historia caracterízanse pola súa peculiaridade e levan a diferenza como bandeira. Unha proposta para entender que a diversidade é enriquecedora e imprescindible para vivir nun mundo onde predomine a tolerancia, a solidariedade e a convivencia. Un mundo no que as mulleres poidamos ser nós mesmas a cada momento.

¡AGARDÁMOSVOS!

A Federación de ANPAs de centros públicos A Gameliña realiza estas actividades o aveiro da "Axudas dirixidas  ás asociacións de nais e pais do alumnado de centros educativos de Galicia coa finalidade de potenciar a promoción da igualdade e a prevención da violencia de xénero".